- Una vez fai munchos años, yera un principe de fama, valerosu y muy xentil, enamorau d’una Ayalga, qu’habitaba n’un palaciu, todu cincelau en plata.
¿Qué ye una Ayalga, güelina? tal paez nombre de planta.
- Una Ayalga, ye una neña, que la tienen encantada y custodiandu tesoros, vive por siempre encerrada en una gruta, que dientro tá de sedes afombrada, tien per candiles, diamantes; con sándalu tá afumada.
¿Ye güapina?
- Com’un lliriu que flotase sobre el agua, musties violetes coronen so frente nítida y pálida; y flores azules ciñen so talle finu de Xana.
¿Y si roben les riqueces cuando la neña descansa?
- Miles de Cuélebres rondien alrededor de la entrada; y de noche tá el Busgosu vixilando la morada.
¿El Busgosu? ¿Quién ye, güelina?
- ¿Vas a callate, rapaza? Estáte atenta al mió cuentu. Y cuandu yo falo, calla. El Busgosu ye un xigante que tien les pates de cabra y unes pezuñes fendíes qu’al mesmu Demontre espanta. Tien cuernos grandes, de chivu, y muy fosca la mirada.
¿Y esi xigante, ¿qué fai?
- Ye, de los bosques, el guarda. Pero, ¿vais dexame, nietes? ¿En qué demónganu taba?…¡Ah! sí… qu’un principe bellu andaba tras una…
Ayalga. ¿Non ye así comu llamó a la mocina encantada?
- …Y vino Xuanón y dixo…
Güelina ¿qué tien? ¿qué i pasa?
- …Esti baile ye pa mí… los Inxanos ye una casta d’enanucos muy traviesos…
¡Ay, Güelina! ¿ya no acaba esi cuentu tan preciosu?
Tiendrá que ser pa mañana. Nunca ye pa terminalos. ¡Pobre, güelina del alma!
Ya tá con los anxelinos. Tá en so cielu… Duerme… Suaña.
No hay comentarios:
Publicar un comentario