Esti besu que hoy te mando...

¡Ay, Lluna, Llunina, Lluna,
Llunina de lluz de plata,
candil qu’allumbre sin fueu
con rayinos de lluz blanca!

¡Ay, Llunina! ¿qué milagru
y’el milagru de tu alma
que fai añorar ternuras
y en mares d’amor nos baña?

Esa lluz que nos envíes
en guedeyines de nácar
¿ye lluz?
¿hechizu?
¿sospiru?
¿Ye el alientu d’una xana?
¿Comu ye que nos arrulla?
¿Por qué, balades nos canta?
¿Comu ye que siendo lluz
paez, de plumes, almohada
en que posamos les penes
al fin de nuestra xornada?

¡Ay, Llunina, Lluna buena,
mensajera de bonanza!
¡Cuántu te debo de paz!
¡Cómu ye la cuenta llarga
de les noches, blanques noches,
que me diste tú, de calma!

Tú, que sabes les tristures
de miós hores d’añoranza;
tú, que sabes de les diches
de miós hores d’esperanza;
tú, que veles les vixilies
de la qu’en tierra lexana,
poniéndote de testigu,
por mí, en sos rezos, desgrana
un rosariu de illusiones
que trenza miéntrenes suaña;
tú, ¡palombina de nieves,
mensajera bienamada!
¿quiés devolve-i una prenda
qu'él pa mí te emprestara?
Pos lleva-i al qu’espera
esti cachin de mió alma:
esti besu qu’hoy engüelvo
en tus guedeyes de nácar.
Que yo sé qu’el que me diste
la noche en que yo penaba
y que fizo qu’el mió llantu
en ríu de perles cuayara,
diótelu él, mió maríu,
pa esta muyer que lu anhelaba.

¡Con qué mimu me punxiste
esi besu n’a mió cara!
¡Con qué gozu lu traíes
engüeltu en tu lluz de plata!