Como aquella moza...

Per entre unes sebes
camín de mió casa
topéme a una moza
con una ferrada.

Frotéme los güeyos,
creí que suañaba.
¡Neña tan fermosa
xamás l’atopara!

Al vela tan nidia,
xentil y galana,
guardóse la Lluna
tras una montaña;

-pa mí era vergüenza
qu’a la Lluna i daba
o temor, acasu,
a la comparanza-.
Crucié la verea,
corrí p’atrapala;
pero la palomba 
ya ‘nel prau non taba.

Prestóme la Lluna
la so lluz de plata,
y anque yera un llanu,
non vi a la rapaza
qu’anantes la viera
con una ferrada.

Pensé n’un lluceru,
creíla una Xana.
Yérame imposible
non juera un fantasma.
Talmente la tierra
paez la tragara.

Pasaron los años.
Non soy pa olvidala.
Xamás vi una moza
tan fresca y perguapa
como aquella neña
que vi de pasada
per entre unes sebes
camín de mió casa.